تررررررررررررررررررن.........تررررررررررررررررررن
جمعاوى وهو يتمطع : .........ياااادى النيله ... خلص رمضان والعيد وجات الدراسه والصحيان بدرى والمحاضرات....امرنا لله لازم نقوم
قام جمعاوى وهو دايخ ومدروخ لقى الحاجه قاعده في الصاله
جمعاوى: صباح الخير ياماما
ام جمعاوى : صباح الخير ياحبيبي...انت رايح النهارده الجامعه
جمعاوى : ان شاء الله.....هروح اجيب جدول المحاضرا وكده يعنى
ام جمعاوى : ربنا معاك يا حبيبي....يللا اغسل وشك وتعالى عشان تفطر
جمعاوى : ماشي يا ست الكل...بالاذن
طلع جمعاوى لقى الوالده مجهزاله فطار ملوكى.........من كل مالذ وطاب ...اشي فول واشي طعميه ..... حاجه معتبره ع الاخر
جمعاوى : ايه يا ست الكل دا كله ...... فول وطعميه على سفره واحده
ام جمعاوى : ياد بطل التريقه بتاعتك دى واقعد كلك لقمتين قبل ما تنزل
جمعاوى : ناكل وماله...هو في احلى م الفول والطعميه...اهو حتى الواحد يروح الجامعه ويفوت م السور على طول بدل ما حرس الجامعه يقولوا كارنيهك ولا بطاقتك ...مش كده يا حجه ولا ايه :)
ام جمعاوى : ياد انت وبعدين معاك ماتاكل وانت ساكت
خلص جمعاوى الفطار وحبس بكوباية الشاي وبقى مية فل واربعتاشر ...وجررررى راح لبس الحته اللى ع الحبل ولمع الجزمه وحط البرفان والجيل وبص في المرايه محدثا نفسه : اشطه ياد يا جمعاوى....شكلك ولا توم كروز في زمانه ..... نضارة الشمس بس وتبقى ايــــه.......
خد جمعاوى موبايله وسلم ع الحاجه ونزل في طريقه لصاحبه الانتيخ عشان يروحوا مع بعض للجامعه
زيكووووووووووو.............جمعاوى ينادى على صديقه
زيكو م البلكونه....ايوه يا جيمو نازل اهو
وف ثانيه كانو الاتنين مع بعض ف طريقهم للجامعه
جمعاوى : الا انا سمعت ياد يا زيكو ان احنا عندنا 8 مواد التيرم ده
زيكو : اشطه احنا قدها وقدود
جمعاوى : وسمعت برضه ان جايلنا دكتور مفترى هيطلع عنينا
زيكو : برضه قشطه احنا قدها وقدوووود
جمعاوى : لا وسمعت كمان ان الكتب والكارنيه هيغلوهم السنادى اكتر م السنه اللى فاتت
زيكو : اشطه بردك احنا قدها وقدود
جمعاوى : ىخر حاجه سمعتها بقي ان الكابتشينو والبورجر والكانز هيرفعوا برضه اسعارهم
زيكو : لاااااااا ....الا الكابتشينو...الا البورجر....الا الحاجه الساقعه .... انا مش حمل كده خااااالص .........حرام عليهم يعملوا فينا كده ليه :(
جمعاوى : يللا بقى كل واحد بياخد نصيبه هنعمل ايه....احنا نبقى نجيب معانا سندويتشات وزمزميه م البيت زى زمان واشترى دماغك
وبعد حوار طويل بين زيكو وجمعاوى وصل الاتنين للجامعه لقوا عسكرى الامن سادد الباب
جمعاوى : عايزين نعدى يا كابتن
الكابتن : كارنيهك يااستاذ
زيكو : احنا لسه معملناش الكارنيهات...احنا ف اول السنه
الكابتن : اه صحيح لا مؤاخذه لسه طالعين من صيام ورنجه وكده بقى كل عام وانتم بخير....ادخلوا ادخلوا
في ساحة الجامعه.......شباب وبنات كتيييير جايين بلبس العيد بقى وعرض ازياء واييييييه
زيكو : اشطه ياد يا جمعاوى......شايف البنات عاملين في نفسهم ايه
جمعاوى : ياد يا زيكو انت مش هتبطل البحلقه بتاعتك دى.....متخليك في حالك
زيكو : طب بذمتك يا شيخ واحده لابسه كده وملعلطه ف قلب الجامعه...ازاى مهبصش عليها ...غصبن عنى يا جمعاوى...عنيه هى اللى بتحود عليهم
جمعاوى : ماشي يااخويا ابقي خلى البحلقه دى تنفعك ..... بس خد بالك كده حرام
زيكو : ايه يا حيمو انت هتقلبلى لسكة حلال وحرام ويجوز ولا يجوز...بقولك ايه يا بوب هدى اللعب وخلينا في المود
جمعاوى : براحتك يا بنى يللا بس نشوف الجدول.....هناك اهو
زيكو : يللاااا بينا
جمعاوى : يوه دا احنا علينا محاضره دلوقتى حالا في مدرج 2 يلا بينا بسرعه
زيكو : ياعم على مهلك طيب هو الدكتور هيطير
جمعاوى : يللا ياد عايزين نبدا كويس بلاش كلكعة كل سنه اللى بتطلع على عنينا فى الاخر دى
زيكو : اووووف حاضر
و دخل زيكو وجمعاوى المدرج وخدوا اول محاضره اللى هى تعريف بس بالمنهج .....وانتهى اليوم وكل واحد روح على بيته....وبكده كان انتهى اليوم الاول في الجامعه لكن مغامرات جمعاوى لسه ماانتهتش
تابعوا معانا يوميات جمعاوى
......واووووعوا تروحوا بعيد
0 قالوا رائيهم:
إرسال تعليق